《烚下烚下》
上一個post比Imene一言驚醒恪克人，不得不寫返篇文同大家分享下我地係香港既美食之旅。
係佢黎之前既前一個星期我真心好苦惱。日唸夜唸要帶佢食乜野，邊度去邊度會順路d。因為呢次好可能係佢唯一一次黎香港，所以我就好似突然有左強迫症禁，好想將香港所有最正既野塞曬比佢。
如果你問我香港最正係咩，我一定答你係無限既美食。無論係近至中、日、韓，遠至土耳其、意大利、秘魯，你up得出既我相信都可以係呢個係地圖上面連一粒鼻屎都不如既香港搵到。重點係，全部都係超水準，好好味阿！可能你會唔同意呢句說話，但如果你試過係歐洲食過佢地所謂既sushi，你一定明我點解話香港既異國菜真係超曬班。
講返條橫丫腸，話說第一晚佢到埗我地就去左食雲吞麵，連從來唔食蝦既佢都大讚雲吞呢樣發明真係好偉大。之後幾日，我地分別去左朋友屋企打邊爐，品香樓食小菜，翡翠拉麵食上海麵、小籠包，勝香園食茄牛麵，蓮香樓食蝦餃燒賣，街邊拮魚蛋，重有好多不在此詳述。講左禁多，大家唸唔唸到最後果一日Imene問我d咩呢。登登登登:why Hong Kong people eat boiled food everyday? 真心，我真心比佢吹漲。
我自以為精心安排既美食之旅，得到既回應竟然係：點解你地要boil每一樣野？細至街邊既魚蛋，到茶樓既蒸籠，到係自己屋企你地班香港人都要烚下烚下，到底係為左乜野。果一秒鐘我真係講不出聲。我心唸，呢個世界唔係淨係有boiled同fried架！boiled都可以分蒸/烚/煲/炆，樣樣都唔同架。我好想講比佢知，但我英文太有限完全唔知點解釋。下一秒鐘我又唸到另一個原因，因為成日食煎炸野會熱氣囉！但再下一秒，我又講不出聲。到底有無人可以話我知熱氣呢2個字可以點樣用英文解釋，燥底又可以點解釋？
去到最後，我只係想講一句，香港既野你識條鐵咩，禁多正野都唔識欣賞，你就真係烚下烚下啦。（不屑mode)
Ps講時講，下個月又有徳國朋友黎香港，我到底應該帶佢食咩好。
Translation:
My friend from Tunisia asked me why Hong Kong people eat boiled food everyday?
I answer: Hong Kong food, u know iron mei?
下圖為好難得既一餐係食韓燒，終於唔係boiled food.
Pic: Finally not boiled food but Korean barbecue food. Thanks god.
Search